मुंबई सेंट्रल रेल्वे टर्मिनसचे नामकरण नाना शंकरशेट करण्याची प्रक्रिया सुरु असल्याची माहिती केंद्रीय गृह राज्य मंत्री नित्यानंद राय यांनी माजी केंद्रीय मंत्री तथा शिवसेनेचे दक्षिण मुंबईचे खासदार अरविंद सावंंत यांना पत्राद्वारे दिली आहे.

      खासदार सावंत यांनी याबाबत केंद्रीय गृहमंत्री राजनाथ सिंह यांना पत्र लिहून मुंबई सेंट्रल रेल्वे टर्मिनसला नाना शंकरशेट यांचे नाव देण्याबाबत काय निर्णय झाला याची माहिती विचारली होती.

      मुंबई सेंट्रल रेल्वे टर्मिनस ला नाना शंकरशेट यांचे नाव देण्याबाबत महाराष्ट्र राज्य सरकारचा प्रस्ताव केंद्रीय गृह मंत्रालयाला मिळाला असून त्याबाबतची प्रक्रिया सुरु आहे. सर्व संबंधित विभागांचा अहवाल आल्यानंतर याबाबत योग्य निर्णय घेतला जाईल, असे केंद्रीय गृह राज्य मंत्री नित्यानंद राय यांनी कळवले आहे.

     याबाबत खासदार अरविंद सावंत म्हणाले, मुंबई सेंट्रल टर्मिनसला नाना शंकरशेट यांचे नाव देण्याची मागणी फार जुनी आहे. त्याला आधीच फार विलंब झाला आहे. याबाबत राज्य सरकारने विधिमंडळात प्रस्ताव मंजूर केल्यानंतर केंद्र सरकारकडून विलंब होण्याचे कोणतेही कारण नाही. मात्र केंद्र सरकार कडून याबाबत प्रक्रिया सुरु असल्याची माहिती केंद्रीय गृह राज्य मंत्र्यांनी दिल्याने लवकरात लवकर ही प्रक्रिया पूर्ण होईल व नाना शंकरशेट यांचे नाव मुंबई सेंट्रल टर्मिनसला मिळेल, अशी आशा अरविंद सावंत यांनी व्यक्त केली. नाना शंकरशेठ प्रतिष्ठानने मुंबई सेंट्रल टर्मिनसला नानांचे नाव देण्यासाठी खूप आंदोलने केली तसेच खूप अथक प्रयत्न केले त्याची ही पावती असून लवकरच नानांचे नाव मुंबई सेंट्रल टर्मिनसला मिळेल असा मला ठाम विश्वास असल्याची माहिती नाना शंकरशेट प्रतिष्ठानचे सरचिटणीस मनमोहन चोणकर यांनी दिली.