मुंबई, दि. 1: चार पॅनेल्स आणि त्यांचे तब्बल 63 उमेदवार रिंगणात उतरल्यामुळे अत्यंत चुरशीच्या ठरलेल्या मुंबई मराठी पत्रकार संघाच्या द्वैवार्षिक निवडणुकीत गुरुवारी परिवर्तन पॅनलने 14 पैकी 10 जागा जिंकत बाजी मारली आहे. या पॅनलचे कार्यवाह या पदावर संदीप चव्हाण निवडून आले असून उपाध्यक्षपदाच्या दोन जागांवर शैलेंद्र शिर्के आणि स्वाती घोसाळकर हे दोन्ही उमेदवार जिंकले आहेत.

        विशेष म्हणजे, कार्यकारिणी सदस्य पदाच्या 9 जागांपैकी 7 जागांवरही परिवर्तन पॅनलच्याच उमेदवारांनी विजयाचे निशाण फडकावले आहे. या निवडणुकीत दोन विश्वस्तपदावर राही भिडे आणि देवदास मटाले हे दोघे ज्येष्ठ पत्रकार निवडून आले आहेत. मटाले हे ज्येष्ठ पत्रकार ज्ञानेश महाराव यांच्या ' आपलं पॅनल' चे उमेदवार होते. विश्वस्तपदासाठी लढलेल्या अजय वैद्य आणि अनिकेत जोशी या दोन उमेदवारांची या निवडणुकीत निराशा झाली.

      तर, पत्रकार संघाच्या अध्यक्षपदी विकासपूर्ती पॅनलतर्फे नरेंद्र वाबळे यांची फेरनिवड झाली आहे. त्यांच्या पॅनेलने अध्यक्षपदासह चार जागा मिळवल्या आहेत. त्यात नवनिर्वाचित कोषाध्यक्ष पदावरील जगदीश भुवड आणि आत्माराम नाटेकर, उमा कदम या दोघा कार्यकारिणी सदस्यांचा समावेश आहे.

        गुरुवारी मुंबईत मुसळधार पाऊस कोसळत असताना त्याला न जुमानता मतदार असलेल्या 541 पत्रकार सदस्यांपैकी 409 पत्रकारांनी मतदान केले. एकूण मतदान 76 टक्के इतके झाले. या निवडणुकीत कार्यकारिणी सदस्यपदाच्या 9 पैकी 7 जागांवर परिवर्तन पॅनलचे राजेंद्र हुंजे, किरीट गोरे, गजानन सावंत, दिवाकर शेजवलकर, राजेश खाडे, देवेंद्र भोगले, राजीव कुलकर्णी हे उमेदवार विजयी झाले आहेत.

       निवडणूक रिंगणात उतरलेल्या ज्येष्ठ पत्रकार ज्ञानेश महाराव आणि प्रभाकर पवार यांच्या अनुक्रमे 'आपलं पॅनल' आणि ' प्रभाकर पवार पॅनल' यांना कार्यकारिणीतील एकसुद्धा जागेवर विजय मिळवता आलेला नाही.

*संजय परब, मंगेश वरवडेकर* 

*यांना विजयाची हुलकावणी*

          =================

        मुंबई मराठी पत्रकार संघाच्या या निवडणुकीत परिवर्तन पॅनलला आपला परिवर्तनाचा संकल्प साकार करण्यात लक्षणीय यश मिळाले आहे. पण या पॅनलचे अध्वर्यू अध्यक्षपदाचे उमेदवार संजय परब आणि कोषाध्यक्षपदाचे उमेदवार मंगेश वरवडेकर या दोघांनाही विजयाने थोडक्यात हुलकावणी दिली आहे.

विश्वस्तपद (पदे २)

राही भिडे (विजयी) 221

देवदास मटाले (विजयी) 215

अजय वैद्य 154

अनिकेत जोशी 100

अध्यक्षपद

नरेंद्र वाबळे (विजयी) 131

संजय परब  119

प्रभाकर पवार 97

ज्ञानेश्वर महाराव 53

सुरेश वडवलकर 4

उपाध्यक्षपदे (2 पदे)

शैलेंद्र शिर्के (विजयी) 150

स्वाती घोसाळकर (विजयी) 141

सत्यवान ताठरे 103

प्रवीण काजरोळकर 93

दीपक परब 90

सुधाकर काश्यप 75

कार्यवाह 

संदीप चव्हाण (विजयी)162

विष्णू सोनवणे 101

निशांत सरवणकर 97

पांडुरंग म्हस्के 38

कोषाध्यक्ष

जगदीश भोवड (विजयी) 148

मंगेश वरवडेकर 143

घनश्याम भडेकर 77

अमोल राऊत 24

कार्यकारिणी सदस्य (विजयी उमेदवार)

राजेंद्र हुंजे 146

किरीट गोरे 137

आत्माराम नाटेकर 135

गजानन सावंत 133

दिवाकर शेजवलकर 131

राजेश खाडे 124

देवेंद्र भोगले 124

उमा कदम 123

राजीव कुलकर्णी 121.