१२ सार्वजनिक क्षेत्रातील, १२ जुन्या जमान्यातील खाजगी, सहा विदेशी, ५६ प्रादेशिक ग्रामीण बँकेतील दहा लाखांवर बँक कर्मचारी आणी अधिकारी बँक खाजगीकरणाच्या विरोधात दोन दिवसाच्या संपावर जात आहेत. या बँका १५० लाख कोटी रुपयांचा म्हणजे एकूण बँकिंग व्यवसायाच्या ७० टक्के व्यवसाय हाताळतात. 

      हा संप प्रामुख्याने सरकारने आय डी बी आय आणि दोन खाजगी बँकांच्या खाजगीकरणाची जी घोषणा केली आहे त्याच्या विरोधात आहे. महामारी चे पार्श्वभूमीवर निदर्शने, धरणे, मेळावे इत्यादी कार्यक्रम संघटित करणे शक्य नाही हे लक्षात घेता बँक कर्मचारी तसेच अधिकारी आपल्या ग्राहकांना घरोघर तसेच व्यवसायाच्या ठिकाणी जाऊन भेटत आहेत या शिवाय ते आमदार, खासदार, जिल्हा परिषद सदस्य, कॉर्पोरेटर, विवध राजकीय पक्षाच्या पदाधिकाऱ्यांना देखील जाऊन भेटत आहेत. 

        या संपात महाराष्ट्र राज्यातील दहा हजार पेक्षा जास्त शाखेतून काम करणारे अंदाजे पन्नास हजार बँक कर्मचारी तसेच अधिकारी सहभागी होत आहेत ज्या बँका अंदाजे तीस लाख कोटींचा व्यवसाय हाताळतात. संपाची सुरवात सकाळी सहा पासून सेवा शाखा ज्या चेक क्लिअरिंग चे काम पाहतात तेथून होईल ते मंगळवारी रात्रीं बारा पर्यंत हे कामकाज बंद राहील. या संपात बँकेत काम करणारे सफाई कर्मचारी ते शाखा व्यवस्थापक सर्व श्रेणीतील अधिकारी सहभागी होत असल्यामुळे संप शंभर टक्के यशस्वी होईल असा विश्वास युनायटेड फोरम ऑफ बँक युनियन चे महाराष्ट्र राज्य चे निमंत्रक देवीदास तुळजापूरकर यांनी व्यक्त केला आहे. या संपात ऑल इंडिया बँक एम्प्लॉइज असोसिएशन, नॅशनल कॉन्फेडरेशन ऑफ बँक एम्प्लॉइज, ऑल इंडिया बँक ऑफिसर्स कॉनफेडरेशन, ऑल इंडिया बँक ऑफिसर्स असोसिएशन, इंडियन नॅशनल बँक ऑफिसर्स काँग्रेस, इंडियन नॅशनल बँक एम्पलॉइज फेडरेशन, नॅशनल ऑर्गनायझेशन ऑफ बँक वर्कर्स, नॅशनल ऑर्गनायझेशन ऑफ बँक ऑफिसर्स आणि बँक एम्प्लॉइज फेडरेशन ऑफ इंडिया या संघटना सहभागी होत आहेत.