३१ ऑक्टोबर हा दिवस भारताचे लोहपुरुष, एकात्मतेचे शिल्पकार सरदार वल्लभभाई पटेल यांची जयंती म्हणून साजरा केला जातो. भारत सरकारने २०१४ पासून या दिवशी राष्ट्रीय एकता दिन साजरा करण्यास सुरुवात केली. पटेल यांच्या अथक प्रयत्नांमुळे देशातील असंख्य संस्थानांचे विलिनीकरण होऊन भारताची राजकीय एकता साकारली गेली.

      या पार्श्वभूमीवर ना. म. जोशी पोलीस ठाणे यांच्या वतीने आज ३१ ऑक्टोबर सकाळी ८.०० वाजता “रन फॉर युनिटी” ही रॅली मोठ्या उत्साहात आयोजित करण्यात आली. रॅलीची सुरुवात पोलीस ठाण्याच्या आवारातून झाली. “एक भारत, श्रेष्ठ भारत” अशा घोषणा देत विद्यार्थी, खेळाडू, सामाजिक कार्यकर्ते आणि विभागातील नागरिक मोठ्या संख्येने सहभागी झाले.

      या उपक्रमात विभागातील प्रतिष्ठित व्यक्तींची उपस्थिती लाभली. रॅलीनंतर आयोजित छोटेखानी कार्यक्रमात सहायक पोलीस आयुक्त वरळी विभाग श्री. दत्तात्रय नाळे यांनी सरदार वल्लभभाई पटेल यांच्या राष्ट्रनिर्मितीतील महत्त्वपूर्ण योगदानाचा थोडक्यात पण प्रभावी उल्लेख केला. त्यांनी सांगितले की, पटेल यांनी संस्थानांचे एकत्रीकरण करून भारताची अखंडता घडवली; त्यांच्या दूरदृष्टीमुळे आज आपण एकसंध भारतात जगतो.

      रॅलीदरम्यान सहभागी विद्यार्थ्यांमध्ये प्रचंड उत्साहाचे वातावरण होते. राष्ट्रीय एकता दिनाच्या निमित्ताने सर्वांनी समाजातील ऐक्य, सद्भावना आणि देशभक्तीची भावना जपण्याचा संकल्प व्यक्त केला.

     कार्यक्रमाच्या शेवटी सक्रिय सहभाग आणि उल्लेखनीय कामगिरी बजावणाऱ्या सहभागींचा सन्मान प्रमाणपत्र देऊन करण्यात आला.